Tradisi/Adat Istiadat Masyarakat Desa Padarek anu Masih Dimumule

BABACAKAN & SIDEKAH BUANGAN

Sumber            :           Bapa Kamil & Ibu Kuraenah

BABACAKAN

          Babacakan nyaeta tradisi meuncit domba jeung sidekah dahar babarengan anu dilaksanakeun di makamna anu baheula ngababak Desa Padrek nyaeta Bapak Buyut Bakal.
Anu ngalaksanakeun babacakan dikokojoan ku 60 kasikepan (jalma anu anu dibere tanah ku pamarentah anu baheulana miboga jasa pikeun Desa Padarek) anu aya di Desa Padarek. Babacakan teh hiji sidekah ngamimitian ngolah sawah. Tujuanna manuhun kanu kawasa sangkan hasil panenna mencekil. Hikmah tina ngalaksanakeun babacakan nyaeta tempat pamakaman jadi raresik. Sabab dina ngarana babacakan, keur nungguan daging domba asak teh warga nu sejenna ngaberesihan makam. Sikep anu ayeuna geus maraot, babacakanna diwakilan ku turunanna. Sabenerna dina babacakan teu kudu sikep anu miluan, tapi saha bae warga Desa Padarek menang miluan babacakan.

SIDEKAH BUANGAN

          Sidekah buangan nyaeta tradisi masyarakat Padarek anu dilaksanakeun sabada panen dina waktu jumat kaliwon pasosore. Tempatna di satiap ujung kampung anu aya di Desa Padarek. Ieu sidekah buangan teh tanda nganuhunkeun ka anu kawasa berkat hasil panen anu mencekil. Dina waktu harita masyarakat Padarek ngumpulkeun sabagian dahareun hasil tina panen. Aya tumpeng ditambahan lauk sejenna. Anu hadir dina eta acara mulai ti barudak laletik nepi ka para sesepuh. Sabadana hasil panen anu dikumpulkeun diduaan, terus dibagikeun rata ka anu masyarakat anu hadir di dinya. Eta dahareun teh kudu seep di tempat, teu meunang dibawa ka imah. Lamun teu seep diparabkeun ka ingon-ingon.

Catetan :

            Bedana babacakan jeung sidekah buangan nyaeta dina babacakan mah wajib aya pepencitan. Tapi dina sidekah buangan mah teu wajib.